National Executive Committee
Dennis is op 6 Des 1947 in Bloemfontein as die derde kind van Johannes Hendrik Pretorius en Sarah Helen le Pierre Boshoff gebore
Hy ontvang skoolopleiding by Grey Kollege, Bloemfontein tot 1961 en word daarna 'n Transvaler by Florida Hoërskool tot 1963. Hy werk na skool by SAS en H en studeer deeltyds aan die Universiteit van Suid Afrika.
Gedurende hierdie jare ontmoet hy vir Minnie Pretorius, destyds student-onderwyseres aan die Goudstad Onderwyskollege. Hulle trou in 1969 in Dundee, Minnie se geboortedorp, en twee dogters en ‘n seun word uit hierdie huwelik gebore.
Hy dien 17 jaar op die bestuur van Krugersdorp Publisiteit – later Mogale Toerisme – en is tans die Direkteur van Mogale Toerisme. Sedert 1991 is hy lid van Krugersdorp Rotary Klub en gedurende 1993 President van die Klub – tans Tesourier van Rotary Krugersdorp.
Dennis is vanaf 1998 ‘n ywerige navorser van familiegeskiedenis en stigterslid en voorsitter van die Wes-Gauteng Tak van die Genealogiese Genootskap van Suid Afrika. Hy dien vir etlike jare op die Nasionale Raad van die Genealogiese Genootskap van SA.
Dennis is passievol daaroor om aangenome kinders te help om hulle biologiese ouers te vind.
Petro Coreejes-Brink is in 1973 in Bellville Wes-Kaap gebore en het skool gegaan by Brackenfell laer- en hoërskole. Sy het aan die Universiteit van Stellenbosch gestudeer en die grade B. Bibl. Hon BA en 'n MA in Kultuurgeskiedenis verwerf. Vir die afgelope 15 jaar is sy by die Kaapse Skiereiland Universiteit van Tegnologie betrokke waar sy tans die pos van Senior Bibliotekaris beklee. Sy is verantwoordelik vir agt takbiblioteke en dié biblioteke se gemeenskapsuitreikaktiwiteite.
Sy is die President van die Genealogiese Genootskap van Suid-Afrika (GGSA) en is betrokke by verskeie genealogie projekte van die GGSA, onder andere die begraafplaasprojek, waar sy haar liefde vir hierdie vakgebied as deel van die Genootskap uitleef.
Petro is met Sybrand Brink getroud en hulle het twee kinders. Haar navorsingsbelangstelling is die vanne: Coreejes, Pheiffer en Van Sittert.
Sy was ook vir 'n aantal jare betrokke in 'n bestuurshoedanigheid, op beide tak en nasionale vlak, by die SA Vereniging vir Kultuurgeskiedenis (SACTU).
